你有無諗過用 iPhone 開巴士公司嘅 App 睇到站時間，Google 都會紀錄咗呢？近年大家對於使用網上服務及流動通訊服務嘅私隠越來越重視，呢排又有好多同網絡保安有關嘅新聞，其實你又知唔知，你同我其實每日都俾自己嘅手機同電腦監視住呢？

相信大家同我一樣，唔多唔少都有用 Google 提供嘅服務，好似 Gmail、Google Maps 等等。原來 Google一直都有收集同記錄我哋上網嘅習慣同埋相關嘅資料，不過近來 Google 就俾用戶自己睇返部份收集咗嘅數據，咁去邊度睇呢？

你可以打開登入咗嘅 Chrome 瀏覽器，之後按瀏覽器右上角嘅小圖示，再揀 Google 帳戶，你就會去到一個 Google Account 嘅版面。揀左面嘅 Data & Personalization，之後右面會見到 Activity & Timeline，好! 等我試下 Activity 先，嘩，唔只去過邊個網頁，睇過乜嘢產品，連用過部份嘅 App 都有紀錄？奇就奇在我用緊嘅係 Apple iOS 平台，點解其他 App Google 都會知呢？

深入研究之後發現，呢啲 App 入邊都有嵌入式嘅 Google 廣告，好似九巴個 App 咁，其實我琴日只係用嚟 Check 吓巴士到站嘅時間，點知呢個動作都比 Google 收錄埋喇。

再睇下 Payments & Subscriptions 先，除咗收錄咗我經 Google 買嘅服務之外，我電郵入邊所有訂機票、酒店甚至餐廳訂枱嘅紀錄都全部有晒，有啲連我自己都唔記得，都咪話唔得人驚。

Google 亦都喺同一個頁面有解釋點解要收集資料嘅。按照 Google 嘅講法，以上收集咗嘅資料可以俾佢哋更有效提供準確嘅搜尋同埋人工智能服務俾用戶，點人工智能法呢，譬如我哋查詢Google Maps， Google 就可以用我哋以前嘅資料，計算出最啱我哋嘅路線，又或者喺 YouTube 睇片會建議更多相關嘅影片俾我哋。聽落好似好合理，之不過同一時間我哋嘅喜好又會唔會變成更加值錢嘅廣告商數據呢？

除非完全唔用 Google 嘅服務，如果唔係都幾難逃出呢個資料蒐集嘅平台。不過 Google 官方亦都有提供方法管理以及刪除我哋搵到嘅資料，喺 Google Accounts 入面嘅 Data & Personalization，你可以喺 Activity controls 一項入面，選擇你唔想 Google 個人化嘅項目，另外你亦都可以喺 My Activity 入面，查閱同埋刪除相關嘅資料。

網絡同埋科技帶俾我哋方便，但係我哋嘅私隱似乎就越嚟越無保障喇。

《Z世代達人》
麥卓華